بمبوطي من بورسعيد @@@@@ بقلم محمد العمراني العمراني
- بمبوطي من بورسعيد
- @@@@@@
- آهن وآه وآهين
- وفوقيها آهه كمان
- كانت الركوبه زمان
- عربيه بالفرسان
- لوالى والاعيان
- والمشى ع الرجلين
- للباقى مهمن كان
- نُص الفِرَنْك وكان
- بيرن فى الدكان
- حبلين ونور وفانوس
- قصاقيص ورق الوان
- ملح ولمون وزتون
- ونخلله لرمضان
- ونجيب دقيق وزبيب
- ونشغل القرآن
- وان قالوا بكره العيد
- نسهر نلم صجان
- وبزيت وفص لمون
- مرهم ومنه دهان
- والملح للمحسود
- بنرشه فى الاركان
- شربه وشيح للدود
- والزفه للعرسان
- وحجامه للمهدود
- والهجر للنسيان
- البيت ف أول دور
- والبحر جمبيه
- واخواتى من منصور
- دقدق وحربيه
- جوفايه فيلا وسور
- على بيتنا محنيه
- وانا كان هوايتى الصيد
- والبوصه متنيه
- ام الخلول بالزيت
- وطحينه مسقيه
- وشكوكو جنب البيت
- و بيقلى طعميه
- ونسوى قدرة فول
- وندق دقيه
- بسطرمه وسط البيض
- فى الطاسه مكفيه
- وبمليمين اتنين
- عشوة وتمشية
- وان جت اجازه الصيف
- باقضيها وحديا
- وامدد الرجلين فوق
- منى شمسيه
- على ودنى سماعتين
- والقله جمبيا
- والقرش والقرشين
- كانو كنز وغنيمه
- والبركة كات بتزيد
- وجنيهنا له قيمه
- العصر نشرب شاى
- مش ناقصه تلقيمه
- والجبنه جوه رغيف
- لها طعم وقديمه
- أُم الفقير بِلْيل
- كات قاعده ع القهوه
- فى البرد عز الشتا
- مش خايفه تستهوا
- وان شافت الستات
- تفرد وتستقوى
- العربى ماشى هناك
- بيدلع الخطوه
- وف ايده لمبة جاز
- تتهز م الخطوه
- العربى كان محلاس
- فى الحته له سطوه
- سلسلته كات متراس
- وميداليته مطوه
- اللمبى كان تمثال
- مربوط فى ترسينه
- واوجينا باستكبار
- مشنوقه فى جنينه
- حرقوا الالمبى بنار
- ابن الالمبوحه
- ومراته وسط النار
- حلوه وقنزوحه
- مرزوقه ماسكه التار
- واللاسه كات بمبى
- والسمسميه تقول
- شيك شيك تعالى جمبى
- مرزوقه ها تقيد نار
- زنانه ولحوحه
- وام الفقير بالشاى
- ع الكرسى ملووحه
- وما كانش فيه فهلوا
- ولا شىء كُوْلِيْشِن كان
- قلب الرغيف مستوى
- قابب وكان خمران
- وام الفقير تشترى
- بمعاشها جوز حِلقان
- واللحمة كات بريال
- والكل كان غلبان
- ولا حد فينا اشتكا
- ولا حد كان زهقان
- والبكلويز انتكا
- صدفه وليها لسان
- والبن بالمستكا
- وبخور بفص لبان
- والنكته كات مُضْحِكَا
- وجيرانا كانوا جِدعان
- البحر كان بيبان
- سبع تمن تلوان
- كرتونه للكتكوت
- وعصايه للغربان
- شمسايه للبطوط
- لقمايه للخرفان
- نبلايه للعصفور
- فتلايه فى اللى ودان
- وبمليمين اتنين
- تركب معديه
- من بورفؤاد نوبتين
- أو بورسعيد سيان
- حنطور فانوسه نحاس
- وبيضوى من اللمعان
- والعرقسوس فى الكاس
- بيرطب الحران
- نشوى الشبار ع النار
- ونشمشم الدخان
- وان جيبنا كيلو خيار
- بنلفه بالجورنان
- وزرومبه بالمقوار
- وبيحشى فى بدنجان
- يغرف لى بالمقدار
- وانا أقوله كبشه كمان
- صباحين وحته ياعرب
- ميت فل وآلِصطا
- وكيريسيا وسط الليل
- بتنادى على كوستا
- وِيَنِّى كان سهتان
- فى دماغه شعره جنان
- أصل احنا كونا زمان
- عايش معانا يونان
- والبحر عمره ماهاج
- بيطل ع المينا
- وسفينه جايه هناك
- ها تصف نواحينا
- فاصلوا معانا كتير
- وأخدنا وادينا
- والغربه والتهجير
- رَّفَّسْ وِدَاس فِينا
- العربى لنشو كبير
- وحباله ف ايدينا
- زعق مع الخواجات
- مسكوله سكينه
- العربى م التهديد
- طلعتله جونينا
- ربط الحبال ف حديد
- والهلب اسفينا
- العربى اصله عنيد
- عمره ما حاس بينا
- بالضبه والمفتاح
- سَكينا على المينا
- فى تلاته وفسبعين
- العربى يحمينا
- قدِف بمجدافتين
- وفلوكه على سينا
- دمر له دبابتين
- والنصر كان لينا
- بطبنجه ورصاصتين
- عبَّط وِباس فينا
تعليقات
إرسال تعليق